स्वार्कने आपला पहिला वार्षिक उपक्रम २०१९ मध्ये ज्ञानज्योती विद्यामंदीर, पुणे या शाळेतल्या मुलांबरोबर सुरु केला. इयत्ता पाचवी ते आठवी मध्ये शिकणारी १२० मुलं या प्रकल्पामध्ये सहभागी झाली होती. दर आठवड्यातून दोन तास स्वार्कचे ताई दादा मुलांबरोबर काम करायचे. या प्रकल्पाचा मध्यवर्ती विषय ‘पाणी’ असा होता. पाण्याशी निगडीत गणित, विज्ञान, भूगोल, भाषा या विषयांमधल्या वेगवेगळ्या संकल्पना मुलांनी समजून घेतल्या. यासाठी नृत्य, नाट्य, खेळ, प्रयोग, क्षेत्रभेट यांसारख्या माध्यमांचा आधार घेतला गेला. मुलांकडून चर्चेतून आलेले मुद्दे आणि त्यांचा अभ्यासक्रमातील संकल्पना या दोन्हीमध्ये ताळमेळ राखत ‘पाणी’ हा प्रकल्प आकार घेत होता. द्रवस्वरुपातील वस्तुंच मापन, पाण्याचं प्रदूषण, पाण्यावरच्या कविता, पाणी टंचाई, पाणीप्रश्नावर काम करणाऱ्या संस्था, पाणी आणि आपली जवाबदारी यांसारख्या अनेक संकल्पनांवर मुलांनी काम केले.पुण्यातल्या मुठा नदीतल्या प्रदूषणावर काम करणाऱ्या ‘जीवित नदी’ या संस्थेतर्फे आयोजित केलेल्या ‘river walk’ या उपक्रमात भाग घेतला. नदीच्या जवळून फेरी मारून नदीविषयी माहिती मिळवली. प्रत्यक्ष नदीची परिस्थिती बघितल्यानंतर नदीचे प्रदूषण रोखण्यासाठी काय करता येईल याविषयी मुलांनी स्वतः विचार केला आणि त्याबाबतची जबाबदारी सुद्धा त्यांना आपणहून कळली.